CNA៖យោធាបានវាយឆ្មក់ចូលទីស្នាក់ការកណ្តាលគណបក្សរបស់លោកស្រី អ៊ុងសាន ស៊ូជី ក្នុងទីក្រុងយ៉ាំងហ្គោន កាលពីយប់ថ្ងៃអង្គារទី៩ ខែកុម្ភៈម្សិលមិញនេះ។
ការវាយប្រហារចុងក្រោយលើភាពជាអ្នកដឹកនាំស៊ីវិលរបស់មីយ៉ាន់ម៉ា បានកើតឡើងចំពេលកំហឹងពលរដ្ឋចំពោះការធ្វើរដ្ឋប្រហារកាលពីសប្តាហ៍មុន និងការឃុំខ្លួនលោកស្រី អ៊ុងសាន ស៊ូជី ដោយពួកឧត្តមសេនីយ៍បានជំរុញឲ្យប្រជាជនរាប់សែននាក់ចេញតវ៉ាតាមផ្លូវ ផ្គើនបម្រាមរបស់រដ្ឋាភិបាលយោធាប្រឆាំងនឹងការប្រមូលផ្តុំគ្នា។
គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) បានប្រកាសនៅលើទំព័រ Facebook របស់ខ្លួនថា “មេដឹកនាំផ្តាច់ការយោធា បានវាយឆ្មក់និងកម្ទេចទីស្នាក់ការកណ្តាលគណបក្ស NLD នៅម៉ោងប្រមាណ៩:៣០យប់ថ្ងៃទី៩ ខែកុម្ភៈ ឆ្នាំ២០២១។
យ៉ាងណាក៏ដោយ សេចក្តីថ្លែងការណ៍ខ្លីរបស់គណបក្ស មិនបានផ្តល់ព័ត៌មានលម្អិតបន្ថែមទេ។
សូមជម្រាបថា ការវាយឆ្មក់នេះបានកើតឡើងបន្ទាប់ពីបាតុកម្មបានឈានចូលថ្ងៃទី៤កាលពីថ្ងៃអង្គារ ដោយប៉ូលិសបានប្រើកាណុងបាញ់ទឹកនៅតាមទីក្រុងជាច្រើន ហើយបានបាញ់គ្រាប់កាំភ្លើងជ័រទៅលើក្រុមអ្នកតវ៉ានៅរដ្ឋធានីណៃពិដោ និងបាញ់ឧស្ម័នបង្ហូរទឹកភ្នែកនៅ Mandalay។
ការប្រមូលផ្តុំគ្នានេះបានកើតឡើង បើទោះបីជាមានការព្រមានពីរដ្ឋាភិបាលយោធាថា នឹងចាត់វិធានការប្រឆាំងបាតុកម្មដែលគំរាមកំហែងដល់ស្ថិរភាព និងការហាមឃាត់ថ្មីលើការប្រមូលផ្តុំមនុស្សច្រើនជាងប្រាំនាក់ក៏ដោយ៕
