មណ្ឌលគិរី៖នៅព្រឹកថ្ងៃទី១៣ ខែកុម្ភៈ ឆ្នាំ២០២១
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី អមដំណើរដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត លោកឧត្តមសេនីយ៍ទោ សាន គឹមអឿន មេបញ្ជាការតំបន់ប្រតិបត្តិការសឹករងមណ្ឌលគិរី មេបញ្ជាការរងកងរាជអាវុធហត្ថខេត្ត ថ្នាក់ដឹកនាំមន្ទីរអង្គភាពពាក់ព័ន្ធ និងអាជ្ញាធរស្រុក បានអញ្ជើញចុះសួរសុខទុក្ខ និងនាំយកគ្រឿងឧបភោគបរិភោគ និងថវិកាមួយចំនួន ផ្តល់ជូនកងកម្លាំងនគរបាល យោធាការពារព្រំដែន និងកងវិស្វកម្មស្ថាបនាក្រវ៉ាត់ព្រំដែន ដើម្បីលើកទឹកចិត្តដល់កងកម្លាំងដែលបានលះបង់ ទាំងកម្លាំងកាយចិត្ត ក្នុងកិច្ចការពារបូរណភាពទឹកដី ក្នុងការទប់ស្កាត់ការរីករាលដាលនៃជំងឺកូវីដ-១៩ តាមព្រំដែននៃប្រទេសជិតខាង ក្នុងភូមិសាស្រ្តស្រុកពេជ្រាដា និងស្រុកកោះញែក ខេត្តមណ្ឌលគិរី។
ឯកឧត្តម អភិបាលខេត្ត បានពាំនាំនូវការផ្តាំផ្ញើសាកសួរសុខទុក្ខ នឹងក្តីនឹករលឹកពីសំណាក់សម្តេចតេជោ ហ៊ុនសែន នាយករដ្ឋមន្រ្តី នៃព្រះរាជាណាចក្រកម្ពុជា ជូនចំពោះកងកម្លាំងនគរបាល និងយោធា ដែលកំពុងឈរជើងនៅតាមបន្ទាត់ព្រំដែន ដើម្បីការពារសន្តិសុខសណ្តាប់ធ្នាប់ឲ្យមានលក្ខណៈល្អប្រសើរ ជាពិសេស ការទប់ស្កាត់ការរីករាលដាលនៃជំងឺកូវីដ-១៩ តាមព្រំដែននៃប្រទេសជិតខាង។
ឯកឧត្តម បានបញ្ជាក់ថា ផ្លូវប្រវត្តិសាស្ត្រក្រវ៉ាត់ព្រំដែនខេត្តមណ្ឌលគិរី ត្រូវបានកម្លាំងវិស្វកម្មស្ថាបនារួចរាល់ប្រមាណពី ៦០ទៅ ៧០ភាគរយ ដែលនេះ គឺជាផ្លូវយុទ្ធសាស្ត្ររបស់រាជរដ្ឋាភិបាលក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុនសែន ដែលបានជួយសម្រួលកងកម្លាំងឈរជើងការពារព្រំដែនងាយស្រួលចូលទៅគ្រប់គ្រង និងការពារបូរណភាពទឹកដីការពារជាតិមាតុភូមិ។
ឯកឧត្តម ស្វាយ សំអ៊ាង បន្ថែមថា ផ្លូវក្រវ៉ាត់ព្រំដែន មានទំហំ៨ម៉ែត្រ ប្រវែង៣១៤គីឡូម៉ែត្រ ដែលកំពុងលូនកាត់លាតសន្ធឹងតាមបណ្ដោយបន្ទាត់ព្រំដែនកម្ពុជា-វៀតណាម លើទឹកដីខេត្តមណ្ឌលគិរី ចាប់ពីចំណុចព្រំប្រទល់ស្រុកកែវសីមា ឆ្លងកាត់ស្រុកអូររាំង នឹងបញ្ចប់ត្រឹមស្រុកកោះញែក គឺជាសក្ខីភាពថ្មីមួយសម្រាប់ប្រជាជនកម្ពុជា ដែលជាផ្លូវយុទ្ធសាស្ត្ររបស់រាជរដ្ឋាភិបាលក្នុងការការពារទឹកដីនិងជាផ្លូវសេដ្ឋកិច្ចថ្មី សម្រាប់ប្រជាពលរដ្ឋរស់នៅក្នុងតំបន់ ក៏ដូចជាក្នុងប្រទេសកម្ពុជា មិនត្រឹមតែប៉ុណ្ណោះ ផ្លូវមួយខ្សែនេះបានជួយសម្រួលដល់ បណ្ដាកងកម្លាំង ដែលមានតួនាទីការពារនៅតាមគោលដៅសំខាន់ៗ និងជាការបិទបញ្ចប់នូវបញ្ហាជម្លោះព្រំដែនផងដែរ។
បើទោះបីជាកម្ពុជានៅមានការខ្វះខាតនូវធនធានមួយចំនួនក៏ដោយ រាជរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំង ចំពោះការជំរុញ ដល់ការងារការពារជាតិ ជាពិសេសការពារទឹកដី។
ឯកឧត្តម អភិបាលខេត្ត ក៏បានជម្រុញដល់បណ្តាកងកម្លាំងឈរជើងតាមបន្ទាត់ព្រំដែន ត្រូវបង្កើនការយកចិត្តទុកដាក់ និងរឹតបន្តឹងលើការឆ្លងដែនខុសច្បាប់ ខណៈកម្ពុជាកំពុងប្រយុទ្ឋប្រឆាំងយ៉ាងខ្លាំងក្លាពីការឆ្លងរីករាលដាលនៃជំងឺកូវីដ១៩ ជៀសវាងមានប្រជាពលរដ្ឋឆ្លងដែនគេចពីការត្រួតពិនិត្យសុខាភិបាល អាចនាំហានិភ័យចម្លងជំងឺចូលក្នុងសហគមន៍។
នាឱកាសនោះ ឯកឧត្តម ស្វាយ សំអ៊ាង អភិបាលខេត្ត ក៏បានផ្តល់នូវគ្រឿងឧបភោគ បរិភោគ និងថវិកាមួយចំនួន ដើម្បីចែកជូនដល់កងកម្លាំងនគរបាល កងកម្លាំងយោធាកាពារព្រំដែន និងកងវិស្វកម្មស្ថាបនាផ្លូវខ្សែក្រវ៉ាត់ព្រំដែន ដោយក្នុងមួយស្ថាប័នទទួលបាន ៖ អង្ករ ១៦បេ, មី ១២កេះធំ, ត្រីខ ០១កេះធំ, សម្ភារៈការពារកូវីដ-១៩ និងថ្នាំពេទ្យមួយចំនួន និងថវិកាក្នុងមួយប៉ុស្តិ៍ៗចំនួន ៥០ម៉ឺនរៀល សម្រាប់ដោះស្រាយការហូបចុកប្រចាំថ្ងៃ និងការពារជំងឺកូវីដ-១៩ផងដែរ ៕វ៉ាន់មុនី
