ក្រុមជនដៃដល់លួចកាប់បុរស២នាក់បណ្តាលឱ្យស្លាប់ម្នាក់និងរបួសធ្ងន់ម្នាក់

បន្ទាយមានជ័យ៖ក្រុមជនដៃដល់មិនស្គាល់មុខបានលួចកាប់បុរស២នាក់បណ្តាលឱ្យស្លាប់ម្នាក់និងរបួសធ្ងន់ម្នាក់ហើយក្រុមនេះបានរត់គេចខ្លួនបាត់អស់។ហេតុការណ៍គួរឱ្យរន្ធត់នេះ បានកើតឡើងនៅម្តុំផ្ទះជួល ស្ថិតក្នុងភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណកាលពីយប់ទី២១ ខែមីនា ឆ្នាំ២០២១។
លោកឧត្តមសេនីយ៍ត្រី នូ ជីវ័ន្ត ស្នងការរងទទួលការងារព្រហ្មទណ្ឌ ខេត្តបន្ទាយមានជ័យ បានឱ្យដឹងថា៖ជនរងគ្រោះដែលស្លាប់ឈ្មោះ ឈីវ ហាក់ ភេទប្រុស អាយុ៣៨ឆ្នាំ មុខរបរជាងដែក ស្នាក់នៅនិងធ្វើការក្នុងស្រុកស្វាយចេកខេត្តបន្ទាយមានជ័យ។ ប្រពន្ធឈ្មោះ យុង ណី អាយ៣០ឆ្នាំ។ចំណែកជនរងរបួសធ្ងន់ធ្ងរដោយសន្លប់អត់ដឹងខ្លួនមិនទាន់ស្គាល់អត្តសញ្ញាណនៅឡើយ។
លោកឧត្តមសេនីយ៍ត្រី នូ ជីវ័ន្តបានបន្តថា៖ ជនរងគ្រោះត្រូវជនដៃដល់កាប់បណ្តាលចំកញ្ចឹងកខាងក្រោយប្រវែងជាង១តឹក ទើបបណ្តាលឱ្យស្លាប់ក្បែរម៉ូតូ។ម្នាក់ទៀតកាប់ចំក្បាល បណ្តាលឱ្យរងរបួសធ្ងន់សន្លប់មិនទាន់ដឹងខ្លួននោះឡើយ បច្ចុប្បន្នកំពុងសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ជប៉ុនមង្គលបូរី។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក៏បានឱ្យដឹងថា៖ ករណីកាប់សម្លាប់គ្នាបណ្តាលឱ្យមានអ្នកស្លាប់ និងម្នាក់ទៀតរបួសធ្ងន់នេះ នៅមិនទាន់ដឹងមូលហេតុច្បាស់លាស់នៅឡើយទេ។ ប៉ុន្តែអាចដឹងព័ត៌មានខ្លះៗ ព្រោះជនរងគ្រោះមានគ្នា២ទៅ៣នាក់ជិះម៉ូតូម៉ាកហុងដាឌ្រីម ពាក់ផ្លាកលេខបន្ទាយមានជ័យ 1T.4518 ចូលក្នុងផ្ទះជួល ក៏ស្រាប់តែត្រូវបានជនដៃដល់ លួចធ្វើសកម្មភាពកាប់ប្រហារតែម្តង។
លោកស្នងការ បានបន្តថា៖ បច្ចុប្បន្នកម្លាំងជំនាញចុះពិនិត្យកន្លែងកើតហេតុ គឺម្ចាស់ផ្ទះជួលបានគេចខ្លួនបាត់ ។ចំណែកអ្នកស្នាក់នៅប្រមាណជាង១០បន្ទប់នោះក៏នាំគេចខ្លួនបាត់អស់ទៀត។ លោកឧត្តមសេនីយ៍ត្រី នូ ជីវ័ន្ត ស្នងការរងនគរបាលខេត្តបន្ទាយមានជ័យ បានដឹកនាំកម្លាំងជំនាញស្រាវជ្រាវ ដើម្បីស្វែងរកចាប់ជនដៃដល់ យកមកដាក់ទោសតាមច្បាប់៕