ខេត្តកណ្ដាល៖ អ្នកបើកបររថយន្តយីឌុប ពាក់ស្លាកលេខ «ខម» មួយគ្រឿង ត្រូវសមត្ថកិច្ចកងរាជអាវុធហត្ថ ចាប់វ៉ៃខ្នោះ ក្រោយឆែកឆេររកឃើញមានបង្កប់ជនជាតិចិន ស្រី-ប្រុស ២នាក់ នៅក្នុងរថយន្តនោះ ។
ករណីលួចបង្កប់ជនជាតិចិន មិនខ្វល់នឹងបម្រាមឆ្លងខេត្តមួយទៅខេត្តមួយដើម្បីបង្ការជំងឺឆ្លងកូវីដ-១៩នេះ បានកើតឡើង នៅស្រុកលើកដែក ខេត្តកណ្ដាល កាលពីថ្ងៃទី ១១ ខែមេសា ឆ្នាំ២០២១ ។
បុរសខ្មែរមួយរូប ជាអ្នកបើកបររថយន្ត យីឌុប«ខម» នៅមិនទាន់ស្គាល់អត្តសញ្ញាណនៅឡើយ បានបង្កប់ដឹកជនជាតិចិន២នាក់(ដើម្បីប្រាក់) ពីភ្នំពេញទៅបាវិត លុះមកដល់ស្រុកលើកដែក បុកបារ៉ាស់សមត្ថកិច្ច បន្តឆ្លងស្ពានអ្នកលឿង ចូលទៅដល់ទឹកដីព្រៃវែង ត្រូវសមត្ថកិច្ចខាងព្រៃវែងចាប់ជាប់ ប្រគល់អោយទៅខាងខេត្តកណ្តាលវិញ ។
ជុំវិញហេតុការនៃការបង្ក្រាបនេះថា នៅពេលអ្នកសារព័ត៌មានកោះសន្តិភាព ទាក់ទងសាកសួរ បញ្ជួនអ្នកបើកបររថយន្ត ទៅដល់ណាហើយនោះ លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា «ទាក់ទងនឹងករណីនេះ សូមសួរទៅខាងអយ្យការសាលាដំបូងខេត្តកណ្ដាល ព្រោះអី ពាក់ព័ន្ធជាមួយនឹងខាងអយ្យការ លោកជាអ្នកដឹកនាំ» ។
យ៉ាងណាមិញ អយ្យការសាលាដំបូងខេត្តកណ្តាល មិនអាចទំនាក់ទងបានទេ នារសៀលនេះ ខណៈអភិបាលខេត្តកណ្តាល លោក គង់ សោភ័ណ្ឌ ក៏មិនទាន់អាចបញ្ជាក់ជុំវិញការបង្ក្រាបនេះនៅឡើយ ដោយសារតែលោកបានអះអាងថា កំពុងជាប់ប្រជុំ ៕