មណ្ឌលគិរី៖ ពលរដ្ឋជនជាតិដើមភាគតិចជាច្រើនគ្រួសារ នាំគ្នាផ្ទុះការតវ៉ាកើតទុក្ខមិនសុខចិត្ត ដោយមានបុគ្គលពាលពីរនាក់ ម្នាក់ឈ្មោះ ឌឿន និងម្នាក់ទៀតឈ្មោះ ធឿន រួមនិងបក្ខពួក អាងអំណាចលុយអាងខ្នងដើរសំឡុត គំរាមកំហែង កេងប្រវ័ញ្ចដណ្ដើមយកដីអាស្រ័យផលរបស់ពលរដ្ឋរាប់សិបហិកតា គ្មានអាជ្ញាធរជួយអន្តរាគមន៍សោះ នៅចំណុចទួលពង្រ ឃុំស្រែព្រះ ស្រុកកែវសីមា ខេត្តមណ្ឌលគិរី។
ប្រភពពីពលរដ្ឋបានឲ្យដឹងថា បុគ្គលពីរនាក់ខាងលើរួមនឹងបក្ខពួក បានដើរសម្លុតគំរាមកំហែងដណ្ដើមកាន់កាប់ដីប្រជាពលរដ្ឋដែលកំពុងអាស្រ័យផលរាប់ឆ្នាំ ខណៈដែលបុគ្គលទាំងពីរនេះទើបមករស់នៅក្នុងតំបន់នេះ បានតែជាងពីរឆ្នាំប៉ុណ្ណោះ។
ប្រភពបានបន្តថា ពួកគាត់បានរងនូវការគំរាមកំហែងពីសំណាក់បុគ្គលខាងលើរួមនឹងបក្ខពួកថា នឹងចាប់ពួកគាត់ដាក់គុក ប្រសិនបើហ៊ានតវ៉ា មិនតែប៉ុណ្ណោះថែមបានដកកម្ទេច បំភ្លេចបំផ្លាញកសិផលរបស់ពួកគាត់ថែមទៀតផង។
អាស្រ័យហេតុនេះ ពលរដ្ឋសូមសំណូមពរដល់អាជ្ញាធរ និងថ្នាក់ដឹកនាំ មេត្តាជួយអន្តរាគមន៍ចុះមកត្រួតពិនិត្យមើលដល់ទីតាំង ដើម្បីជួយដោះស្រាយនិងផ្ដល់យុត្តិធម៌ដល់ពួកគាត់ដែលជាប្រជាកសិករស្លូតត្រង់ ដែលរស់នៅពឹងអាស្រ័យលើកសិផល ដែលបានមកពីការធ្វើស្រែចំការដំណាំដាំដុះ នៅចំណុចដីអាស្រ័យផលខាងលើ ពោលគឺ រកព្រឹកខ្វះល្ងាច ហើយបានអាស្រ័យផលនៅទីនេះដូនតាំងមកម្ល៉េះ។
ម្យ៉ាងវិញទៀត សូមអាជ្ញាធរពាក់ព័ន្ធ មេត្តាត្រួតពិនិត្យលើបុគ្គលទាំងពីរនាក់ឈ្មោះឌឿន និងឈ្មោះធឿន នេះផង៕វ៉ាន់មុនី