កំពង់ឆ្នាំង៖ ករណីបុរសម្នាក់ដុតផ្ទះសម្លាប់ប្រពន្ធនិងកូន៦នាក់(ទាំងកូនក្នុងផ្ទៃម្តាយ)នៅស្រុកបរិបូណ៍ខេត្តកំពង់ឆ្នាំងកាលពីយប់ថ្ងៃទី៩ឧសភាកន្លងទៅដែលផ្តើមចេញពីជម្លោះប្តីប្រពន្ធក្នុងរឿងប្តីសុំលក់កងជើងទេវរូបជាវត្ថុបុរាណតែប្រពន្ធមិនព្រមឱ្យលក់។
មន្ត្រីនគរបាលបានឱ្យុដឹងថា៖កងជើងទេវរូបជាវត្ថុបុរាណជានេះត្រូវកម្លាំងនគរបាលខេត្តរឹបអូសពីគំនរផេះផង់នៃផ្ទះដែលត្រូវភ្លើងឆេះបង្កឡើងដោយបុរសជាប្តីដែលសម្លាប់ប្រពន្ធ និងកូនៗ រួចដុតផ្ទះកម្ទេចចោល នៅក្នុងភូមិដើមជ្រែឃុំខុនរ៉ងស្រុកបរិបូណ៍កាលពីយប់ថ្ងៃទី៩ ខែឧសភា ឆ្នាំ២០២១ កន្លងទៅនេះ ហើយយកទៅប្រគល់ឱ្យមន្ទីរវប្បធម៌ខេត្ត។
តាមការស្រាវជ្រាវពីសមត្ថកិច្ចនូវបទល្មើសនេះបានឱ្យដឹងថា៖ឈ្មោះនុនសារ៉េត មកយកស្ត្រីឈ្មោះ អៀន សុខ ជាស្ត្រីមេម៉ាយមានកូន៣នាក់ធ្វើជាប្រពន្ធ។ ពួកគេបានខិតខំរកស៊ី និងបានចំណងដៃស្នេហ៍១ទៀតគឺកូនប្រុសអាយុ៣ឆ្នាំដែលស្លាប់ក្នុងហេតុការណ៍នោះដែរ។មានថ្ងៃមួយ ពេលចាប់ផ្តើមជីកដីសាងសង់ផ្ទះ ក៏បានប្រទះឃើញ “កងជើងទេវរូប”មួយនេះ រួចក៏យកទៅរក្សាទុក។ ក្រោយមកបុរសជាប្តីក៏ធ្វើគ្រូទស្សន៍ទាយ និងព្យាបាលជំងឺជាបន្តបន្ទាប់យ៉ាងកាក់កបរហូតមក ។
ប្រភពដដែលបានបន្តថា៖បន្ទាប់មករឿងរ៉ាវនេះក៏បានដឹងថា មានគេចង់ទិញ “កងជើងទេវរូប” នេះបុរសជាប្ដីក៏ចង់លក់ដើម្បីយកលុយសងបំណុលមេក្រូហិរញ្ញវត្ថុ ដែលនៅជំពាក់ជាង២ម៉ឺនដុល្លារដែល គ្រាន់តែការប្រាក់ត្រូវបង់ ១ខែជាង២លានរៀល។ប៉ុន្តែប្រពន្ធមិនព្រមលក់ ទើបមានទំនាស់គ្នារហូតប្តីខឹងដុតផ្ទះធ្វើមនុស្សឃាតស្លាប់មនុស្ស៦នាក់។
លោក ឃុំ ស៊ាំ ក្រុមប្រឹក្សាឃុំខុនរ៉ង ស្រុកបរិបូរណ៍ បានឱ្យដឹងថា៖ នៅយប់ថ្ងៃកើតហេតុ គឺថ្ងៃទី៩ ខែឧសភានោះ ក្រោយពេលអគ្គិភ័យស្ងប់បន្តិច លោកក៏បានឱ្យប្រជាការពារដឹកឈ្មោះនុន សារ៉េត ទៅ មណ្ឌលសុខភាព ព្រោះតែស្លុតនឹងហេតុការណ៍ខ្លាំងពេក។ស្រាប់តែព្រឹកឡើងថ្ងៃទី១០ ខែឧសភា គាត់ឃើញឈ្មោះនុន សារ៉េត មកដល់ផ្ទះកន្លែងកើតហេតុវិញ ហើយមិនឃើញចាប់អារម្មណ៍នឹងសាកសពដែលស្លាប់រដូករណែលនោះទេ បែជាខំកាយផេះដើររកវត្ថុបុរាណ គឺ “កងជើងទេវរូប”ទៅវិញ ។
ក្រោយមកឈ្មោះ នុន សារ៉េត បានយកវត្ថុបុរាណពីកណ្ដាលផ្ទះ ក្នុងគំនរដែក រួចក៏បានកាន់មកអង្គុយនៅខាងក្រៅ។គាត់ឃើញបែបនេះ ក៏ឱ្យយកទៅទុកខាងក្នុងវិញទៅ ព្រោះកម្លាំងនគរបាលបច្ចេកទេស គេមកធ្វើកោសល្យវិច័យឥឡូវហើយ ទើបឃើញឈ្មោះនុនសារ៉េត យកវត្ថុបុរាណនោះ ទៅដាក់លើរានទេវតាដែលឆេះអស់ខ្លះ នៅមុខផ្ទះ ។
“កងជើងទេវរូប”នេះបើតាមការបញ្ជាក់ពីលោក ចាន់ អាន មេឃុំខុនរ៉ង ស្រុកបរិបូណ៍ វិញបានប្រាប់ថា គាត់ដឹង “កងជើងទេវរូប”នេះមិនមែនបានមកពីការជីកដីសាងសង់ផ្ទះនោះទេ គឺបានមកពីការចាក់ដីក្នុងស្រែដើម្បីធ្វើផ្ទះ ។បុរសនេះបានចាក់ដីមួយឆ្នាំបន្តិចៗ ដើម្បីរៀបចំធ្វើផ្ទះ ។
លុះចុងក្រោយ ពេលចាក់ដីហើយ រថយន្តចេញផុតទៅ បុរសជាប្ដីក៏បានយកចបមកកាយដី ពង្រាបឱ្យស្មើ ហើយក៏បានប្រទះឃើញ “កងជើងទេវរូប” មួយនេះ ហើយបុរសជាប្តីនោះ ក៏បានយកទៅរក្សាទុក ។ក្រោយមកទៀត បុរសជាប្តីនោះក៏បានយកមកបង្ហាញគាត់ជាមេឃុំថា មានគេចង់ទិញ និងក្រោយមកទៀត ឮថាលក់មិនដាច់ទេ ព្រោះជាវត្ថុមិនសុទ្ធ។
សូមបញ្ជាក់ថា វត្ថុបុរាណជា “កងជើងទេវរូប”នេះ មានទម្ងន់ជាង១,៦គីឡូក្រាម ត្រូវបានលោក ញ៉ែម សុភាវី ប្រធានការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលខេត្តកំពង់ឆ្នាំង បានប្រគល់ជូនមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងកាលពីថ្ងៃទី១៣ខែឧសភា ឆ្នាំ២០២១ ដើម្បីរក្សាទុក៕
