កណ្តាល៖អាជ្ញាធរមានសមត្ថកិច្ចស្រុកបានសម្រេចបិទសិប្បកម្មផលិតស្រាមួយកន្លែងជាបណ្តោះអាសន្នបន្ទាប់ពីមានអ្នកភូមិចំនួន៩នាក់បានពុលស្រានេះស្លាប់។មន្ត្រីអាជ្ញាធរខេត្តបានឱ្យដឹងថា៖កាលពីសៀលថ្ងៃទី១៧ខែឧសភា ឆ្នាំ ២០២១ប្រជាពលរដ្ឋបានពុលស្រា បណ្តាលឱ្យស្លាប់ជាបន្តបន្ទាប់ចំនួន៩នាក់ ស្ថិតនៅភូមិតាស្គរ ឃុំសារិកាស្រុកល្វាឯមខេត្តកណ្តាល។
មន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំហៅកាត់ ក.ប.ប បានឱ្យដឹងថា៖ បន្ទាប់ពីទទួលបានព័ត៌មាននេះ មន្ត្រីជំនាញបានចុះត្រួតពិនិត្យសិប្បកម្មផលិតស្រាស និងស្រាថ្នាំមួយកន្លែង ដែលសង្ស័យថា ជាដើមហេតុ នៃការស្លាប់របស់ជនរងគ្រោះទាំងនោះ។
មន្រ្តីបានបញ្ជាក់ថា៖ក្រោយពី មន្ត្រីជំនាញបានធ្វើតេស្តដោយឧបករណ៍រថយន្តពិសោធន៍ចល័តជាលទ្ធផលបឋម បង្ហាញថា ស្រាសត្រាំថ្នាំ មានសារធាតុមេតាណុល ២,៥ភាគរយ , ស្រាស មានសារធាតុមេតាណុល ២,៥ភាគរយ និងស្រាសទើបតែបិតរួច មិនមានសារធាតុមេតាណុលឡើយ។
មន្រ្តីផ្នែកជំនាញបានធ្វើកំណត់ហេតុឃាត់ទុកបណ្តោះអាសន្ន និងដកយកគំរូមួយចំនួន យកមកវិភាគនៅមន្ទីរ ពិសោធន៍ ដើម្បីបញ្ជាក់លទ្ធផលឱ្យបានកាន់តែច្បាស់ ថែមទៀត។ ក្រុមមន្ត្រីជំនាញ និងអាជ្ញាធរមូលដ្ឋានបានសម្រេចឱ្យម្ចាស់សិប្បកម្មធ្វើកិច្ចសន្យាបិទសិប្បកម្មផលិតស្រាស និងស្រាថ្នាំជាបណ្តោះអាសន្ន រង់ចាំអនុវត្តនីតិវិធីបន្ត ៕