កំពង់ចាម៖ បន្ទាប់ពីចាប់ក្រុមចោរកាច់កម៉ូតូដែលមានកាំភ្លើងបាញ់គំរាមក្នុងក្រុងកំពង់ចាមរួចមកពេលនេះនគរបាលព្រហ្មទណ្ឌខេត្តកំពង់ចាមបានពន្លាតដែនរបស់ខ្លួនតាមចាប់ស្រ្តីម្នាក់ជាបក្ខពួកបានរត់ទៅសម្ងំលាក់ខ្លួននៅខេត្តសៀមរាប ។
លោកឧត្តមសេនីយ៍ទោ ឯមកុសល ស្នងការនគរបាលខេត្តកំពង់ចាមកាលពីថ្ងៃទី១៩ខែឧសភា ឆ្នាំ២០២១នេះ បានឱ្យដឹងថា៖លោកបានចាត់ឱ្យកម្លាំងជំនាញដឹកនាំដោយលោកវរសេនីយ៍ឯក ចាន់ ហោ អនុប្រធានការិយាល័យព្រហ្មទណ្ឌទៅសហការជាមួយកម្លាំងនគរបាលព្រហ្មទណ្ឌកម្រិតធ្ងន់ខេត្តសៀមរាប ដើម្បីចុះអនុវត្តដីកានាំខ្លួន។
លោកបានបន្តថា៖ដីកានាំខ្លួនលេខ ៤២១ ចុះថ្ងៃទី១៨ ខែឧសភា ឆ្នាំ២០២១ ចេញដោយចៅក្រមស៊ើបសួរសាលាដំបូងខេត្តកំពង់ចាមបង្គាប់ឱ្យនាំខ្លួននារីម្នាក់ នៅម្តុំសាលារៀនទឹកលិច ស្ថិតក្នុងឃុំទឹកលិច ស្រុកប្រាសាទបាគង ខេត្ដសៀមរាប។នារីនេះឈ្មោះ គី ចន្ថា ហៅស្រីមុំ ភេទស្រី អាយុ២៥ឆ្នាំបច្ចុប្បន្ននៅភូមិស្វាយជ័យ ឃុំត្រពាំងធំ ស្រុកប្រាសាទបាគង ខេត្តសៀមរាប ពីបទ លួចមានស្ថានទម្ងន់ទោស និងប្រើប្រាស់អាវុធខុសច្បាប់។
តាមចម្លើយសារភាពរបស់ជនសង្ស័យដែលកម្លាំងចាប់ខ្លួនបាន គឺនារីរូបនេះជាអ្នកដឹកជនដៃដល់ឱ្យប្រព្រឹត្តបទលើ្មសតាមរយៈសកម្មភាពកាច់កម៉ូតូដោយប្រើកាំភ្លើងបាញ់គំរាម នៅភូមិបឹងកុក២ ក្រុងកំពង់ចាមកាលពីថ្ងៃទី៩ ខែមេសា ឆ្នាំ២០២១កន្លងទៅ ។
សូមរំលឹកថា កាលពីថ្ងៃទី៦ ខែឧសភា ឆ្នាំ២០២១កន្លងទៅនគរបាលបានចាប់ជនសង្ស័យ៥នាក់។ ក្នុងនោះ៣នាក់ជាប់ពាក់ព័ន្ធការប្រើអាវុធបាញ់គំរាមប្លន់យកទ្រព្យសម្បត្តិជនរងគ្រោះ និងធ្លាប់ធ្វើសកម្មភាពចំនួន១៥លើកក្នុងខេត្តកំពង់ចាមហើយយកទៅលក់នៅរាជធានីភ្នំពេញ។ រីឯ២នាក់ទៀតជាអ្នកចាំទទួលទិញផលចោរកម្មនៅតាមផ្លូវម្តុំវិមានឈ្នះឈ្នះក្ហនុងសង្កាត់ព្រែកព្នៅ ខណ្ឌព្រែកព្នៅដើម្បីបញ្ជូនទៅតុលាការ ចាត់ការតាមច្បាប់ ៕
