បន្ទាយមានជ័យ៖បុរសខ្មែរម្នាក់ធ្វើជាងសំណង់នៅប្រទេសថៃក៏ធ្លាក់ពីលើអគារជាន់ទី៣រងរបួសធ្ងន់ហើយបានស្លាប់ពេលបញ្ជូនមកមន្ទីរពេទ្យខ្មែរស្រុកសំពៅលូនក្នុងខេត្តបន្ទាយមានជ័យកាលពីថ្ងៃទី១៣ខែមិថុនាឆ្នាំ២០២១។
លោក យ៉ត សុផល អធិការនគរបាលស្រុកភ្នំស្រុក បានឱ្យដឹងថា៖សពជនរងគ្រោះឈ្មោះញិបឃាន់ ភេទប្រុសអាយុ៣៧ឆ្នាំ នៅភូមិគោកចាស់ ឃុំណាំតៅ ស្រុកភ្នំស្រុកខេត្តបន្ទាយមានជ័យ បានធ្វើចំណាកស្រុកទាំងគ្រួសារ ទៅធ្វើកម្មករសំណង់នៅប្រទេសថៃក្នុងឃុំមិនបូរីខេត្តណងចក ។
ក្រុមគ្រួសារបានឱ្យដឹងថា៖កាលពីរសៀលថ្ងៃ១១ខែមិថុនា ឆ្នាំ២០២១ ជនរងគ្រោះកំពុងតែធ្វើការបានធ្លាក់ពីលើផ្ទះថ្មដែលកំពុងធ្វើកម្ពស់៣ជាន់ បណ្តាលឱ្យរងរបួសធ្ងន់ធ្ងរ ហើយក៏បានដឹកទៅសង្រ្គោះនៅមន្ទីរពេទ្យថៃ។តែដោយសាររបួសធ្ងន់ធ្ងរពេកមិនអាចព្យាបាលបាន ក្រុមគ្រួសារបាននាំយកមកព្យាបាលនៅមន្ទីរពេទ្យបង្អែកស្រុកខ្មែរស្រុកសំពៅលូនវិញ។លុះដល់ ថ្ងៃទី១៣ខែមិថុនាឆ្នាំ២០២១ជនរងគ្រោះបានស្លាប់។
សពជនរងគ្រោះត្រូវក្រុមគ្រូពេទ្យស្រុកសំពៅលូនបានដឹកមកធ្វើបុណ្យនៅគេហដ្ឋាននៃសពភូមិគោកចាស់ ឃុំណាំតៅ ស្រុកភ្នំស្រុក ខេត្តបន្ទាយមានជ័យ។ ចំពោះប្រពន្ធ និងកូនស្រីរបស់សពបានឱ្យធ្វើចត្តាឡីស័កនៅផ្ទះរបស់ខ្លួនតែម្តង៕
