បន្ទាយមានជ័យ៖កម្លាំងនគរបាលនៅថ្ងៃទី២១ខែមិថុនាឆ្នាំ២០២១បានបញ្ជូនជនសង្ស័យចំនួន៦នាក់ទៅតុលាការករណីនាំមនុស្សឆ្លងដែនខុសច្បាប់ដើម្បីចាត់ការតាមនីតិវិធី។
លោក បោនសីហា អធិការនគរបាលស្តីទីក្រុងប៉ោយប៉ែតបានឱ្យដឹងថា៖ជនសង្ស័យជាមេខ្យល់និងប្រជាពលរដ្ឋខ្មែរសរុបចំនួន១២នាក់ត្រូវកម្លាំងនគរបាលវរសេនាតូចការពារព្រំដែនគោកលេខ៩១១ចាប់ខ្លួនហើយបានបញ្ជូនមកផ្នែកជំនាញនគរបាលក្រុងប៉ោយប៉ែតកាលពីរសៀលថ្ងៃទី១៩ខែមិថុនាឆ្នាំ២០២១។ក្នុងនោះមានវត្ថុតាងទូរស័ព្ទដៃ៦គ្រឿង,កង់បី១គ្រឿងនិងម៉ូតូ២គ្រឿង។
បុរសជាជនសង្ស័យ,ឈ្មោះសុខារ៉ាវុធអាយុ២០ឆ្នាំ,ឈ្មោះខេមរាសូរ៉ាវីតអាយុ៣២ឆ្នាំ,ឈ្មោះលី វ៉នអាយុ១៧ឆ្នាំទាំង៣នាក់នេះជាមេខ្យល់ស្នាក់នៅភូមិបាលិលេយ្យសង្កាត់និងក្រុងប៉ោយប៉ែត។ឈ្មោះ ជីង អាយុ១៧ឆ្នាំ,ឈ្មោះប៉ែន ឆៃណាម អាយុ១៨ឆ្នាំ,ឈ្មោះយួម សឿមអាយុ៣៥ឆ្នាំ ៣នាក់នេះជាអ្នកពាក់ព័ន្ធដឹកជញ្ជូនពលករដើម្បីឆ្លងដែនស្នាក់នៅភូមិបាលិលេយ្យសង្កាត់និងក្រុងប៉ោយប៉ែត។
លោកឌី សុជាតិ ស្នងការរងទទួលផែនការងារបានឱ្យដឹងថា៖ប្រជាពលរដ្ឋចំនួន៦នាក់បានបញ្ជូនទៅធ្វើចត្តាឡីស័កនៅវិទ្យាល័យនិមិត្តក្នុងសង្កាត់និមិត្តក្រុងប៉ោយប៉ែត។ចំណែកជនសង្ស័យជាមេខ្យល់៣នាក់និងអ្នកពាក់ព័ន្ធ៣នាក់ត្រូវកម្លាំងនគរបាលបញ្ជូនខ្លួនទៅតុលាការដើម្បីចាត់ការតាមនីតិវិធីច្បាប់៕