ខេត្តបន្ទាយមានជ័យ ៖ ប្រប្រពីមន្ត្រីគយតំបន់ ៥ បានអោយដឹងថា នៅថ្ងៃទី ២៣ ខែ កញ្ញា ឆ្នាំ ២០២១ កន្លងមកថ្មីៗនេះ មន្ត្រីគយតំបន់ ៥ បានបើករថយន្ត Lexus RX350 ពណ៌ស ពាក់ស្លាកលេខ 2AU-6806 ភ្នំពេញ ដេញបុកបុរសម្នាក់ បើកម៉ូតូស្កុបពី ( Scoopy ) អត់ស្លាកលេខដែលមន្ត្រីគយសង្ស័យថាអត់បង់ពន្ធនាំចូលត្រឹមត្រូវ ។
ហេតុការណ៍នេះបានកើតឡើងនៅចំណុចជិតអូរកំបុតក្បែរឃុំបឹងត្រកួន ស្រុកថ្មពួក ខេត្តបន្ទាយមានជ័យបណ្ដាលឲ្យបុរសម្នាក់របួសធ្ងន់ ។ បុរសដែលជិះម៉ូតូស្កុបពីត្រូវបានគេរាយការណ៍មកថា បានរងរបួសធ្ងន់បាក់ជើងខាងឆ្វេង យ៉ាងដំណុំ។ ក្រោយកើតហេតុ លោក ឈួន សោភា មេគយចល័តតំបន់៥ បានសម្របសម្រួលជាមួយបុរសនោះដោយចេញសងលុយចំនួន ៥០០០ ដុល្លារទៅបុរសនោះដើម្បីបញ្ចប់រឿង ។ ប៉ុន្តែតាមរយៈ ហ្វេសប៊ុករបស់ឈ្មោះ Bong Long Svay បានបង្ហោះរូបថតគ្រោះថ្នាក់បាក់ជើង ដោយសរសេរថា ហេតុអ្វីយកជីវិតខ្ញុំមកលេងសេីចម្ល៉េះ ? ចំណែក ហ្វេសប៊ុកឈ្មោះ Chhin Roth Barca បានសរសេរថា អ្នកសារព័ត៌មានជួយផង គយខេត្តបន្ទាយមានជ័យ ។ សារព័ត៌មានជាច្រើននៅខេត្តបន្ទាយមានជ័យត្រូវបានគេបិទព័ត៌មានករណីនេះ ។ ចំណែកជនរងគ្រោះដែលបង្ហោះ ព័ត៌មាននិងរូបថតរងគ្រោះក៏បានលប់ចេញវិញផងដែរ ។
យើងមិនអាចសុំការបំភ្លឺពីលោកឈួន សោភា បានទេដោយគ្មានលេខទំនាក់ទំនង ។ ប៉ុន្តែតាមរយៈសកម្មភាពកន្លងមករបស់គយតំបន់ ៥ ក្រោមការដឹកនាំរបស់លោក ឈួន សោភា បានបង្ករបញ្ហាជាច្រើនជាមួយពលរដ្ឋនៅខេត្ត បន្ទាយមានជ័យ ។ ប៉ុន្តែដោយគាត់មានខ្សែក្រាស់ ទើបគ្មានអ្នកណាហ៊ានប៉ះឈួន សោភាតំណែងមេគយតំបន់ 5 នេះបានទេព្រោះគាត់មានលុយមានអំណាច ៕ បឋម
