ខេត្តកំពង់ធំ ៖ ប្រភព ពីប្រជាពលរដ្ឋ បានឲ្យដឹងថាជារៀងរាល់ឆ្នាំមហាជនសង្កេតឃើញលោកហុក មុន នាយរងសង្កាត់រដ្ឋបាលជលផលឃុំពាមបាងធ្លាក់ដៃមិនហ៊ានលើកដៃបង្ក្រាបរាល់បទល្មើសនេសាទទេ ព្រោះប្រពន្ធខ្លួនឯងបានទៅឈរជើងនៅនិងស្នាក់ការរបស់ខ្លួនឈរជើង ទិញត្រីពីបទល្មើសនេសាទរាប់ឆ្នាំមកហើយ ។
ប្រភពបានបន្តទៀតថា ចំណែកលោកផាន់ សុផុន ដែលជាមេស្នាក់ការបរិស្ថានឈរជើងជាមួយលោកហុកមុននៅក្នុងភូមិសាស្ត្រភូមិបឡត ឃុំពាមបាង ស្រុកស្ទោង ខេត្តកំពង់ធំ ល្បីខាងកាងបទល្មើសនេសាទគ្រប់រូបភាព ហើយនិងដើរប្រមូលលុយពីបទល្មើសនេសាទ រាប់ឆ្នាំមកហើយដែលប្រជាពលរដ្ឋសង្កេតឃើញមន្ត្រីគ្រាប់ល្ពៅទាំងអស់នេះបានដើរសម្របសម្រួលសារាចរមច្ឆាជាតិឲ្យរលាយអស់ផុតពូជតែម្ដង ប្រជាពលរដ្ឋសូមសំណូមពរទៅគណៈបញ្ជាការឯកភាពខេត្តកំពង់ធំជាពិសេសឯកឧត្តម ងួន រតនៈ ដែលឯកឧត្តមទើបតែផ្លាស់ប្ដូរមកកាន់ខេត្តកំពង់ធំថ្មីសូមឯកឧត្តមមេត្តាជួយរំដោះមច្ឆាជាតិដែលមន្ត្រីគ្រាប់ល្ពៅកំពុងតែឃុបឃិតគ្នា បំផ្លាញទាំងរដូវបិទនេសាទក៏ដូចរដូវបើកនេសាទជារៀងរាល់ឆ្នាំ។
ប្រភពព័ត៌មានពីបងប្អូនប្រជាពលរដ្ឋដែលរស់នៅផ្ទះបណ្ដែតទឹកលើផ្ទៃបឹងទន្លេសាបពួកគាត់បានសង្កេតឃើញសកម្មភាពពុករលួយជាប្រព័ន្ធជាមួយមន្ត្រីគ្រាប់ល្ពៅដែលជាថៅកែឡូត៍នេសាទសព្វថ្ងៃនេះកើតមានឡើងជារៀងរាល់ឆ្នាំមកហើយក៏ប៉ុន្តែថ្នាក់ដឹកនាំក្រសួងពាក់ព័ន្ធចេះតែមើលរំលងហើយគ្មានការផ្លាស់ប្ដូរទុកមន្ត្រីដែលចាក់គ្រឹះដុះស្លែទាំងអស់នេះសប្បាយនឹងរួមដៃគ្នាបំផ្លាញធនធានមច្ឆាជាតិជារៀងរហូត ជាក់ស្ដែងរបាំងស្បៃមុងពណ៍ខៀវ ក្រហម ណូរ៉ាវ ឆក់ត្រជាក់ឆក់ក្ដៅ មានគ្រប់រូបភាពតែមិនដែលឃើញការបង្ក្រាបនោះឲ្យមានប្រសិទ្ធភាពទេនៅពេលដែលអ្នកសារព័ត៌មានធ្វើបទសម្ភាសន៍មន្ត្រីទាំងនោះតែងតែឆ្លើយដាក់ថា ប្រជាពលរដ្ឋក៏ប៉ុន្តែយកលុយពីប្រជាពលរដ្ឋជារៀងរាល់ឆ្នាំដើម្បីរួមគំនិតគ្នាបំផ្លាញមច្ឆាជាតិទាំងតូចទាំងធំ
បទល្មើសនេសាទជាបទល្មើសមួយគួរឱ្យកត់សម្គាល់ដែលថ្នាក់ដឹកនាំនិងក្រសួងពាក់ព័ន្ធទាំងអស់ចេះតែមើលរំលងមច្ឆាជាតិចេះតែថយចុះជារៀងរាល់ឆ្នាំជាក់ស្តែងនៅក្នុងឆ្នាំ 2021 នេះមច្ឆាជាតិមានការថយចុះយ៉ាងខ្លាំងសូម្បីតែចាប់ពីមាត់ព្រៃមកដល់ខាងលើខាងលើគ្មានត្រីណាឡើងមករួចទេដោយសារតែបទល្មើសទាំងអស់នេះដាក់ណែនណាប់យ៉ាងអនាធិបតេយ្យ រីកដូចផ្សិត ជាច្រើនជាន់ធ្វើឲ្យមច្ឆាជាតិធ្វើចរាចរណ៍តាមផ្លូវដែលធ្លាប់ឆ្លងកាត់នោះមិនរួចឡើយ ។
នៅក្នុងករណីការចុះផ្សាយខាងលើនេះអ្នកសារព័ត៌មានយើងបានព្យាយាមទូរស័ព្ទទៅសម្ភាសន៍មន្ត្រីដែលពាក់ព័ន្ធទាំងអស់នេះដែរតែទូរស័ព្ទចុចចូលហើយមិនលើក។