បន្ទាប់ពីមានការបាក់ស្រុតនៅវេលាម៉ោ៩ជាងយប់ថ្ងៃទី១ខែសីហាឆ្នាំ២០២៣ ធ្វើឲ្យមានការកកស្ទះបង្អាក់ចរាចរណ៍ដល់បងប្អូនប្រជាពលរដ្ឋដែលធ្វើដំណើរពីភ្នំពេញទៅ មណ្ឌលគិរី។ឧត្តមសេនីយ៍ទោស្នងការនគរបាលខេត្តមណ្ឌលគិរី លោកឡោ សុខា បានថ្លែងថាបន្ទាប់ពីមានការបាក់ស្រុតនៃកំណាត់ផ្លូវជាតិលេខ៧៦Aមកអាជ្ញាធរបានធ្វើការបិទផ្លូវទាំងស្រុងដោយមិនអាចឲ្យធ្វើចរាចរណ៍បានទេហើយអាជ្ញាធរបានធ្វើការណែនាំក៏ដូចជាអំពាវនាវដល់សាធារណៈជនទាំងអស់ដែលប្រើ ប្រាស់ផ្លូវលេខ៧៦Aធ្វើចរាចរណ៍សូមមេត្តាធ្វើដំណើរផ្លូវវាងជាបណ្តោះអាសន្នសិនតាមខេត្តមួយចំនួនដូចជា កាត់តាមខេត្តរតនគិរី ស្ទឹងត្រែង ខេត្តក្រចេះជាដើម ។
ប្រធានមន្ទីរសាធារណៈការនិងដឹកជញ្ជូនខេត្តមណ្ឌលគិរីលោក រស គឹមឆន បានឲ្យដឹងដែរថា បន្ទាប់ពីលោកទទួលបានដំណឹងថាដាច់នៃកំណាត់ផ្លូវជាតិលេខ៧៦Aត្រង់ចំណុចអូរងើយ លោកក៏បានដឹកនាំបុគ្គលិកនៃមន្ទីរសាធារណការនិងដឹកជញ្ជូនខេត្តនិងគ្រឿងចក្រជាច្រើនគ្រឿងបានទៅដល់នៃទីតាំងដែលបាក់ស្រុតនោះហើយរកវិធីសាស្ត្រធ្វើផ្លូវ វាងដើម្បីជាមធ្យោបាយបណ្តោះអាសន្នសម្រាប់ធ្វើចរាចរណ៍របស់បងប្អូនអ្នកធ្វើដំណើនៅក្នុងខេត្តមណ្ឌលគិរីធ្វើ ចរាចណ៍ផងដែរ ។
លោកបញ្ជាក់ថាយើងនៅមិនទាន់ដឹងពីពេលវេលាណាដែលយើងអាចធ្វើផ្លូវវាងសម្រាប់ប្រជាពលរដ្ឋធ្វើចរាចរណ៍បណ្ដោះអាសន្ននោះនៅឡើយទេ ខណៈមេឃនៅតែបន្តភ្លៀងឥតឈប់ឈរ ។
លោកបញ្ជាក់ទៀតថានៅវេលាថ្ងៃទី២ខែសីហាឆ្នាំ២០២៣នេះដែរ ក្រសួងសាធារណៈការនិងដឹកជញ្ជូននិង ក្រសួងសេដ្ឋកិច្ចនិងហិរញ្ញវត្ថុក៏បានមកពិនិត្យនិងវាយតម្លៃនិង សំណើគម្រោងទៅថ្នាក់ជាតិ។
សូមបញ្ជាក់ផងដែថាៈនៅវេលាម៉ោង៩ជាងយប់ថ្ងៃទី១ខែសីហាឆ្នាំ២០២៣ មានហេតុការណ៍ បាក់ស្រុតផ្លូវជាតិលេខ៧៦ត្រង់ចំណុចអូរងើយ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ។ចន្លោះពីស្រុកអូររាំង និង ស្រុកកែវសីមា ផងដែរ ៕