ខេត្តកំពង់ធំ ៖ សកម្មភាពក្រុមញៀនល្បែងស៊ីសងដ៏ធំប្រចាំនៅក្នុងភូមិក្រសាំង ជាប់នឹងរបងវត្តត្រែង ស្ថិតនៅក្នុងឃុំទ្រា ស្រុកស្ទោង ខេត្តកំពង់ធំ តើលោកមេប៉ុស្តិ៍ដឹងដែរឬធ្វើមិនដឹង។ សកម្មភាពនេះមិនមែនចាប់ផ្ដើមនៅពេលរដូវបុណ្យភ្ជុំបិណ្ឌនេះទេ ។ នៅពេលឱកាសភ្ជុំបិណ្ឌនេះ មកដល់ គឺឈ្មោះអ្នកញៀនល្បែងត្រូវបានប្រជាពលរដ្ឋស្គាល់យ៉ាងច្បាស់ណាស់ ។
មេបាញ់អាប៉ោងមានចំនួន 4 រូប ៖
1-ឈ្មោះ ជា, 2-ឈ្មោះម៉ូត, 3-ឈ្មោះ ហុកលី, 4-ឈ្មោះ រ៉េត ប្រជាពលរដ្ឋបានប្រាប់អ្នកសារព័ត៌មានយើងថា លេងជាប្រចាំក្នុងភូមិក្រសាំង ជាប់របងវត្តត្រែង និងភូមិត្រាច។
ប្រជាពលរដ្ឋសូមកោតសរសើរចំពោះលោកអធិការដែលទើបនឹងឡើងថ្មីៗពាក់ព័ន្ធនឹងការបង្ក្រាបករណីផ្សេងៗទាន់ពេលវេលា ពាក់ព័ន្ធនិងភូមិឃុំមានសុវត្ថិភាពផងនោះ ក៏ប៉ុន្តែច្រើនតែលោកមេប៉ុស្តិ៍ដែលប្រើក្បាច់កន្ទេលធំបន្លំដេក ។ សកម្មភាពល្បែងស៊ីសងកំពុងតែកើតនៅក្នុងមូលដ្ឋានស្រុកស្ទោង ដូចជាអាប៉ោង បៀរ មាន់ជល់តាមប្រព័ន្ធ អនឡាញ កំពុងតែរីករាលដាលដូចផ្សិតចំណែកលោកអធិការស្រុកស្ទោង ជឹម រីណា កំពុងតែធ្វើមិនដឹងធ្វើមិនឮ ឬព្រោះតែមេល្បែងអនឡាញទាំងនោះមានខ្នងបង្អែករឹងមាំ បានជាលោកអធិការមិនហ៊ានចុះបង្ក្រាប ព្រោះតែជាឆ្នាំងបាយរបស់លោកផងក៏មិនដឹង ។
ហេតុនេះហើយបានប្រជាពលរដ្ឋសំណូមពរទៅដល់លោកស្នងការខេត្តកំពង់ធំជួយឱ្យមន្ត្រីនៅក្រោមឱវាទជួយចុះមកមើលទីតាំងល្បែងទាំងនេះផង នៅលើទឹកដីស្រុកស្ទោងជាពិសេស នៅក្នុងភូមិសាស្ត្រទឹកដីឃុំទ្រា និងល្បែងមាន់ជល់អនឡាញ ក្នុងឃុំកំពង់ចិត្តជើង និងឃុំកំពង់ចិត្តត្បូង អ្នកសារព័ត៌មានតែងតែផ្ដល់ព័ត៌មានទៅអាជ្ញាធរស្រុកស្ទោង និងសមត្ថកិច្ចស្រុកស្ទូងផងដែរ តែគ្មានចំណាត់ការទាល់តែសោះ ៕
