ឈ្មួញដីឈ្មោះ ទួន ចន្ទ្រា ដែលកំពុងជាប់ឃុំនៅពន្ធនាគារខេត្តព្រះវិហារ ជាប់ចោទប្រើអំពើហឹង្សាបំផ្លិចបំផ្លាញផ្ទះប្រជាពលរដ្ឋ៦គ្រួសារនៅភូមិស្រយង់ជើង ឃុំស្រយង់ ស្រុកគូលែន ប៉ុណ្ណោះទេ ថែមទាំងធ្លាប់ប្រើល្បិចប្តឹងឲ្យតុលាការចាប់ខ្លួនម្ចាស់ដី ដែលមានប័ណ្ណកម្មសិទ្ធស្របច្បាប់ ដែលហៅប្លង់រឹងនៅភូមិខាងលើនេះទៀតផង។
លោកមឿង សុន ប្រធានអង្គការមូលនិធិទ្រទ្រង់អរិយធម៌ខ្មែរ ដែលមានមូលដ្ឋាននៅប្រទេសបារាំង បានប្រាប់ឲ្យដឹងថា ឈ្មួញដីឈ្មោះ ទួន ចន្ទ្រា នេះបានប្រើល្បិចចង់លេបយកដីរបស់លោកចំនួនជាង១៥ហិតា នៅភូមិស្រយង់លើ ឃុំ ស្រុកគូលែន ខេត្តព្រះវិហារ នេះតាំងពីឆ្នាំ២០២១ ។
លោកមឿង សុន បានប្រាប់ឲ្យដឹងទៀតថា ស្ត្រីឈ្មោះទួន ចន្ទ្រា នេះ បានធ្វើកិច្ចសន្យាទិញលក់ដី១៥ហិចតា នេះ ក្នុងតម្លៃជា១០ម៉ឺនដុល្លារអាម៉េរិក ដោយបានកក់ប្រាក់ចំនួន៣ម៉ឺន៥ពាន់ដុល្លារអាម៉េរិក ។ ប៉ុន្តែ ក្រោយមកឈ្មោះ ទួន ចន្ទ្រា មិនព្រមប្រគល់ប្រាក់ដែលនៅសល់ប្រមាណជាង៧ម៉ឺនដុល្លារអាមេរិក តាមកិច្ចសន្យានោះទេ។ មិនមិនត្រឹមតែមិនព្រមប្រគល់ប្រាក់តាមកិច្ចសន្យានោះទេ ឈ្មោះទួន ចន្ទ្រា បានយកដី១៥ហិកតា ទៅជួលឲ្យអ្នកដទៃដាំដុះលើដីនេះ ថែមទៀតផង។
លើសពីនេះឈ្មោះទួន ចន្ទ្រា បានប្តឹងលោក មឿង សុន ទៅតុលាការខេត្តសៀមរាប ហើយតុលាការខេត្តសៀមរាបបានចេញដីការបញ្ជារឲ្យប៉េអឹមខេត្តសៀមរាបចាប់ខ្លួនលោក ក្រោយមកបានដោះលែងវិញ ដោយសារតែលោកមានឯកសារភស្តុតាងត្រឹមត្រូវ។
លោក មឿង សុន បានឲ្យដឹងបន្ថែមទៀតថា ស្ត្រី ទួន ចន្ទ្រា ក៏បានប្តឹងរូបលោកទៅអយ្យការខេត្តព្រះវិហារ ពីបទព្រហ្មទណ្ឌ ចូលទៅតុលាការខត្តសៀមរាបដែរ ហើយលោកទីវ សុវន្ថាល់ ព្រះរាជអាជ្ញាខេត្តព្រះវិហារ បានចាត់រឿងបណ្តឹងរបស់ស្ត្រី ទួន ចន្ទ្រានេះ ជាបន្តបន្ទាប់។
បន្ថែមពីលើនេះទៀត ស្ត្រី ទួន ចន្ទ្រា បានប្តឹងសុំដីការសម្រេចរក្សាការពារដីជាង១៥ហិកតា ដែលជាកម្មសិទ្ធិស្របច្បាប់របស់លោកមឿង សុន ទៅតុលាការព្រះវិហារ ហើយតុលាការខេត្តព្រះវិហារ បានចេញដីការសម្រេចហាមមិនឲ្យលោក មឿន សុន ផ្ទេរសិទ្ធិ លក់ បញ្ចាំ ធ្វើអំណោយ បានឡើយ។ ប៉ុន្តែ ដីការសម្រេចរក្សាការពាររបស់តុលាការខេត្តព្រះវិហារ ត្រូវសាលាឧទ្ធរណ៍ត្បូងឃ្មុំបដិសេធចោល ។
លោកមឿង សុន បានបញ្ជាក់ថា ទោះបីសាលាឧទ្ធណ៍ត្បូងឃ្មុំបានបដិសេធចោល ដីការ សម្រចរក្សាការពាររបស់តុលាការខេត្តព្រះវិហារ ជាច្រើនខែហើយក៏ដោយ ក៏លោកនៅតែមិនអាចចូលកាន់កាប់ដីដែលជាកម្មសិទ្ធិស្របច្បាប់របស់លោកបាននៅឡើយ ដែរដោយសារតែតុលាកាខេត្តព្រះវិហាមិនបានចុះអនុវត្ត តាមការសម្រេចរបស់សាលាឧទ្ធណ៍ខេត្តត្បូងឃ្មុំនៅឡើយ។ បើទោះបីជា លោកបានដាក់ពាក្យសុំឲ្យអនុវត្តន៍យ៉ាងណាក៏ដោយ។
លោកមឿង សុន បានសំណូមពរឲ្យតុលាការខេត្តព្រះវិហារ មេត្តាចុះអនុវត្តន៍ការសម្រេចរបស់សាលាឧទ្ធណ៍ឲ្យបានឆាប់ ដើម្បីផ្តល់ភាពយុត្តិធម៌ដល់រូបលោក ដែលរងគ្រោះក្រោមល្បិចដ៏ពិសពុលរបស់ស្ត្រី ទួន ចន្ទ្រា ជាច្រើនឆ្នាំមកហើយដែរ៕