ព្រះវិហារ៖ ប្រភពពីសមត្ថកិច្ចខេត្តព្រះវិហារ បានបង្ហើបថា មានប្រជាពលរដ្ឋជាច្រើន បានប្តឹងសមត្ថកិច្ច និងអាជ្ញាធរមូលដ្ឋានទាក់ទឹននឹងការបើកឲ្យលេងល្បែងស៊ីសង តាមប្រព័ន្ធ Online គ្រប់ប្រភេទ យ៉ាងអាណាធិបតេយ្យ កំពុងរីកដូចផ្សិតដែលមាននៅតាមបណ្តាស្រុកនានា ក្នុងខេត្តព្រះវិហារ តែទោះជាយ៉ាងណាក៏មិនមានការចុះបង្ក្រាប។
ពួកគាត់លើកឡើងថា ព្រោះគ្រប់ទីតាំងល្បែងស៊ីសងតាមប្រព័ន្ធ Online ទាំងអស់នោះប្រហែលជាមានខ្សែខ្នងបង្អែកនៅចាំកាងពីក្រោយហើយ ទើបគេហ៊ានឲ្យបើកលេងពេញទូទាំងខេត្តបែបនេះ។
នៅតាមទីតាំងមួយចំនួនដែលកំពុងតែប្រម៉ូលផ្តុំគ្នាលេងយ៉ាងអ៊ូអរបំផុតដូចជានៅទីប្រជុំជន ចំណតរថយន្តក្រុងព្រះវិហារ ទីតាំងហាងការហ្វេនៅភូមិពោធិ៍ ស្រុកត្បែងមានជ័យ ផ្សារស្រុកគូលែន ផ្សារស្រយ៉ង់កោះកេរ្ដិ៍ ភូមិបេងកោង ឃុំព្រះឃ្លាំង តាមអ្នកលេងល្បែងបានបង្ហើបថាហនៅក្នុងក្រុងព្រះវិហារគ្រប់គ្រងដោះស្រាយដោយលោក ឈ្មោះ (រស្មី)ផងដែរ។
បើតាមប្រភពពីប្រជាពលរដ្ឋរស់ក្បែរទីតាំងលេងល្បែង Online ទាំងនោះបានឲ្យដឹងថា តាមភូមិ ស្រុកនានា ក្នុងខេត្តព្រះវិហារទាំងមូលកើតមានការបើកឲ្យស្ទើរតែគ្រប់ភូមិទៅហើយតាមភូមិសាស្ត្រទាំងនេះ បើកឲ្យលេងល្បែងស៊ីសង តាម Online គ្រប់ប្រភេទទាំងអស់ មិនដែលឃើញសមត្ថកិច្ច បង្ក្រាបនោះទេ។
ជុំវិញការបើលេងល្បែងស៊ីសងតាមប្រព័ន្ធ Online នេះមិនមានការចុះបង្ក្រាបទាល់តែសោះ ពីរសមត្ថកិច្ច រហូតដល់ពេលខ្លះពួកគាត់ បានទូរស័ព្ទប្រាប់ទាំងមេប៉ុស្តិ៍ទៀតក៏នៅតែគ្មានការទប់ស្កាត់ និងចុះបង្ក្រាបដដែល។
បញ្ហានេះដែរ បងប្អូនប្រជាពលរដ្ឋបានបង្ហាញការព្រួយបារម្ភខ្លាំងនៅពេលដែលមានបើកឲ្យល្បែងស៊ីសង និងជល់មាន់តាមទូរទស្សន៍អនឡាញទាំងនេះ ដែលបង្កឲ្យមានអំពើហិង្សាកើតឡើងក្នុងគ្រួសារ ក៏ដូចជាចោរកម្មផ្សេងៗមានចោរលួចចោរប្លន់ជាដើម។
ពួកគាត់បានសំណូមពរផងដែរសូមឱ្យអាជ្ញាធរ និងសមត្ថកិច្ចដែលពាក់ព័ន្ធគ្រប់ជាន់ថ្នាក់គួមេត្តា អាណិតអារសូរដល់ក្រុមគ្រួសារពួកគាត់ដែលមានការព្រួយបារម្ភស្ថិតក្នុងការភ័យខ្លាចនោះជួយផ្លាស់ប្តូរឥរិយាបទបែរមកចុះត្រួតពិនិត្យឡើងវិញ និងទប់ស្កាត់ផងដើម្បីផ្តល់ភាពកក់ក្តៅដល់ពួកគាត់ផងដែរការសង្ឃឹមរបស់ពួកគាត់មានតែថ្នាក់ដឹកនាំនៅក្នុងខេត្តព្រះវិហារជាពិសេសឯកឧត្តមអភិបាលខេត្តព្រះវិហារ និងឯកឧត្តមស្នងការខេត្តព្រះវិហារជួយមានចំណាត់ការជូនពួកគាត់ផង៕