កណ្តាល ៖ ចាប់តាំងពីចូលឆ្នាំចិន.វៀតណាមរហូតមកទល់ពេលនេះ ជនជាតិវៀតណាមទាំងប្រុសទាំងស្រីសម្រុកឆ្លងដែនមកទឹកដីខ្មែរតាមច្រកទ្វារព្រំដែនអន្តរជាតិកម្ពុជាវៀតណាមក្អមសំណរយ៉ាងគគ្រឹក គគ្រេង ពោលគឺមកចូលលេងល្បែងមាន់ជល់ និងល្បែងស៊ីសងគ្រប់ប្រភេទនៅក្នុងកាស៊ីណូ(ថ្មពេជ្រ)ស្ថិតក្នុងភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្តាលក្នុងនោះក៌មានជនជាតិខ្មែរជាច្រើនបានចូលរួមលេងភ្នាល់ដាក់លុយរាប់រយរាប់ពាន់ដុល្លារ ។ ចំណែកអាជ្ញាធរនិងសមត្ថកិច្ចអសមត្ថភាពនៅស្ងៀមស្ងាត់មិនរំខានដល់ការចូលលេង ល្បែងក្នុងកាស៊ីណូ(ថ្មពេជ្រ)ឡើយ ។ ទាំងនេះសបញ្ជាក់ថា អស់លោកសមត្ថកិច្ចនៅទីនោះមានទទួលផលលាភសក្ការៈពីម្ចាស់កាស៊ីណូ ដែរឬទេ “ឬក៏ជាឆ្នាំងបាយ” របស់អាជ្ញាធរនិងសមត្ថកិច្ច និងមន្ត្រីប្រចាំការនៃច្រកទ្វារអន្តរជាតិមួយនេះ ដែរឬ?
ជាការពិតណាស់ប្រសិនបើសមត្ថកិច្ចនៅទីនោះបានសើមមាត់សើមកពីម្ចាស់កាស៊ីណូយ៉ាងក្រាស់គ្រែលហើយ ទើបបើកដៃអោយជនជាតិវៀតណាមឆ្លងដែនចូលតាមផ្លូវទឹកនិងផ្លូវគោកមកលេងល្បែងស៊ីសងក្នុងទឹកដីខ្មែរម៉ាសេរី មិនខ្វល់ពីការត្រួតពិនិត្យលើលិខិតឆ្លងដែនអោយបានត្រឹមត្រូវស្របតាមច្បាប់ឬយ៉ាងណានោះទេ។
យោងតាមប្រភពក្រុមញៀនល្បែង បានលួចប្រាប់អ្នកសារព៌តមានអោយដឹងថា កាស៊ីណូមួយកន្លែងមានស្លាកយីហោ(ថ្មពេជ្រ)នេះគ្រប់គ្រងដោយបុគ្គលមានឥទ្ធិពលម្នាក់ឈ្មោះ ឆាយ បានបើកលេងល្បែងស៊ីសងសង្វៀនជល់មាន់ នឹងល្បែងស៊ីសងគ្រប់ប្រភេទជាច្រើនមុខទៀត។ ហើយកន្លែងនេះដុះស្លែយូរ មកហើយ ដោយអនុញាតអោយជនជាតិខ្មែរចូលលេងភ្នាល់ដាក់លុយជាមួយជនជាតិវៀតណាមរាប់រយ រាប់ពាន់ដុល្លារក្នុងមួយគូរៗ ។
សូមបញ្ជាក់ថា រាល់កាស៊ីណូនៅតាមច្រកព្រុំដែនច្បាប់ស្រុកខ្មែរបានអនុញាតិអោយជនជាតិបរទេសចូលលេង មិនអនុញាតិអោយជនជាតិខ្មែរចូលលេងនោះទេរាជរដ្ឋាភិបាលបានកំណត់បើខ្មែរចូលលេង គឺខុសច្បាស់ ។ ចុះបើជនជាតិខ្មែរចេញចូលលេងល្បែងក្នុងកាស៊ីណូ (ថ្មពេជ្រ)បានដោយសេរីបែបនេះតើស្របច្បាប់ដែរឬទេ? បើតាមចរាចរណ៍ណែនាំរបស់រាជរដ្ឋាភិបាល មិនឱ្យខ្មែរចូលលេងបើខ្មែរចូលលេងគឺខុសច្បាប់ ។ តែអស់លោកសមត្ថកិច្ចឈរជើងនៅទីនោះមិនមានវិធានការទប់ស្កាត់ឬបង្ក្រាបបានន័យថាត្រូវរូវគ្នាជាមួយបុគ្គលដែលមានឥទ្ធិពលបើកល្បែងនេះអស់ហើយហេតុនេះហើយបានជាកាស៊ីណូ(ថ្មពេជ្រ)មួយនេះក្លាយជាស្របច្បាប់ហើយ ។ មិនញញើត ប្រសាសន៍សម្ដេចអគ្គសេនាមហាបតីតេជោ ហ៊ុន សែន អតីតនាយករដ្ឋមន្ត្រីមិន ឱ្យខ្មែរចូលលេងឡើយ ។
ពាក់ព័ន្ធបញ្ហានេះដែរ មហាជនរិះគន់ទៅថ្នាក់ដឹកនាំចំៗថា នេះជាអំពើពុករលួយរបស់មន្ត្រីដែលមិនអើពើបង្ក្រាប ករណីនេះរំពឹងថា ឯកឧត្តម គង់ សោភ័ណ អភិបាល នៃគណៈអភិបាលខេត្តកណ្តាលនឹងឯកឧត្តម ឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ចុះស្រាវជ្រាវនិងបង្ក្រាបទីតាំងល្បែងស៊ីសងនៅក្នុងកាស៊ីណូ(ថ្មពេជ្រ)ទាំងនោះឲ្យស្របតាមគោលការណែនាំនិងដាក់ចេញរបស់ក្រសួងសេដ្ឋកិច្ចនិងហិរញ្ញវត្ថុផងទាន ។
ជុំវិញបញ្ហាខាងលើនេះភ្នាក់ងារអង្គភាពសារព័ត៌មាន យើងបានព្យាយាមសួរទៅលោកនាយប៉ុស្តិ៍រដ្ឋបាលដែរ តែលោកប្រាប់ថា អ្នកបើកល្បែងក្នុងកាស៊ីណូនេះខ្សែគេធំណាស់ សូម្បីកម្លាំងបុស្តិ៍រដ្ឋបាលមិនហ៊ានទៅក្បែរគេផង។
ចំណែកលោក អាំ ធូ អធិការនគរបាលស្រុកលើកដែក នៅពេលអ្នកសារព៌តមានយើងវ៉យសម្លេងសួរគាត់តាមប្រព័ន្ធតេឡេក្រាមផងដែរ គឺលោកអធិការគ្រាន់តែចូលមើលតែមិនឆ្លើយតបជាមួយអ្នកសារព៌តមាន ហេតុនេះទំនងម្ចាស់កាស៊ីណូ(ថ្មពេជ្រ )ខ្សែលោកធំហើយទើបធ្វើអោយសមត្ថកិច្ចនិងអាជ្ញាធរក្នុងមូលដ្ឋានស្រុកលើកដែកមិនមានលទ្ធភាពបំភ្លឺឬបង្ក្រាបល្បែងកាស៊ីណូមួយនេះ ឡូយ៕